Дапамагчы дзецям развіваць эмацыянальны інтэлект – адна з галоўных задач сучасных бацькоў

Асаблівае месца падчас станаўлення асобы чалавека займае дашкольнае дзяцінства. Фарміраванне самасвядомасці ідзе паралельна з агульным эмацыянальным і разумовым развіццём дзіцяці, але яго неабходная перадумова — гэта ўзаемадзеянне з дарослым, які задавальняе яго жыццёвыя патрэбы, прывучае да гульні.

Эмацыянальная сфера да­школьніка мае шэраг асаб­лівасцей:

1. Няўстойлівасць і імпульсіўнасць. Эмоцыі ў дашкольнікаў мяняюцца хутка, дзеці могуць лёгка пераходзіць ад радасці да смутку, ад гневу да цікаўнасці.

2. Слабая рэгуляцыя эмоцый. Дашкольнікам складана стры­маць свае эмоцыі, яны могуць бурна выказваць радасць, плакаць, кры­чаць, біцца.

3. Эгацэнтрызм. Дашкольнікі засяроджаны на ўласных перажываннях і не заўсёды могуць зразумець пачуцці іншых людзей.

4. Развіццё сацыяльных эмоцый. У дашкольным узросце развіваюцца такія эмоцыі, як спачуванне, сяброўства, пачуццё віны, сорам.

На станаўленне асобы да­школьніка найперш уплывае сям’я. У ёй дзіця атрымлівае першыя ўяўленні аб сабе, аб сваіх магчымасцях, аб нормах паводзін. Дарослыя, у першую чаргу бацькі, з’яўляюцца для дзіцяці ўзорам для пераймання. Яны вучаць яго вы­казваць свае эмоцыі адпаведна, разумець пачуцці іншых людзей і рэгуляваць свае паводзіны.

Эмоцыі і самасвядомасць цесна ўзаемазвязаны — эмоцыі ўплываюць на тое, як дзіця бачыць сябе і свет вакол. Развіццё эмацыянальнай сферы і самасвядомасці з’яўляецца важнай часткай станаўлення асобы дашкольніка.

Зносіны з аднагодкамі таксама дапамагаюць дзіцяці развіць сацыяльныя навыкі, навучыцца ўзаемадзейнічаць з іншымі людзь­мі. Акрамя таго, важную ролю ў станаўленні асобы дашкольніка адыгрывае выхаванне. У працэсе самастойнай дзейнасці дзеці развіваюць упэўненасць у сабе, ініцыятыўнасць і пачуццё выкананага доўгу.

Рэкамендацыі для бацькоў і педагогаў

1. Стварыце спрыяльную эмацыянальную атмасферу. Акружыце дзіця любоўю, клопатам і ўвагай.

2. Дапамагайце дзіцяці выказ­ваць свае пачуцці. Вучыце дзяцей называць свае эмоцыі і гаварыць пра іх.

3. Развівайце эмацыянальны інтэлект. Вучыце дзяцей распазнаваць эмоцыі іншых людзей і рэагаваць на іх.

4. Садзейнічайце развіццю самасвядомасці. Дапамажыце дзіцяці даведацца свае моцныя і слабыя бакі.

5. Падтрымлівайце здаровую самаацэнку. Хваліце дзіця за яго дасягненні і дапамагайце яму спраўляцца з няўдачамі.

Эмацыянальная сфера і самасвядомасць з’яўляюцца важнымі кампанентамі асобы дашкольніка. Развіццё эмацыянальнага інтэлекту і пазітыўнай самаацэнкі неабходна для здаровага развіцця дзяцей. Развіццё эмацыянальнай сферы і самасвядомасці — гэта працяглы працэс. Кожнае дзіця развіваецца ў сваім тэмпе. Не варта падганяць дзіця і параўноўваць яго з іншымі.

Источник: https://nastgaz.by