У Луцкаўлянскай сярэдняй школе пасля рэканструкцыі адкрылі спартыўны комплекс з футбольным полем

У Луцкаўлянскай сярэдняй школе Гродзенскага раёна пасля рэканструкцыі адкрылі спартыўны комплекс з футбольным полем і шматфункцыянальнай пляцоўкай, паведамляе карэспандэнт “Настаўніцкай газеты”.

Гледзячы на пасёлак, які развіваецца, упэўнены, што 55 гадоў — гэта далёка не мяжа і ўстанова адукацыі будзе жыць і развівацца далей. Адным з яскравых прыкладаў гэтага развіцця з’яўляецца пляцоўка, якую мы адкрылі. Яна таксама прыклад таго, што сумеснымі намаганнямі мы можам аператыўна вырашаць многія пытанні і ра­біць жыццё нашых людзей лепшым. Для кагосьці новая пляцоўка абавязкова стане месцам першага кроку да спартыўнай славы. А для ўсіх астатніх — магчымасцю ўсебаковага гарманічнага развіцця, — адзначыў старшыня Гродзенскага аблвыканкама Ула­дзімір Каранік.

Будаўніча-мантажныя работы на стадыёне Луцкаўлянскай сярэдняй школы пачаліся ў канцы мая 2023 года. Дапамогу ў будаўніцтве аказалі Беларуская федэрацыя футбола, Прэзідэнцкі спартыўны клуб у рамках рэспубліканскага сацыяльнага праекта па падтрымцы спорту і здаровага ладу жыцця “Спорт для ўсіх”. Агульны кошт рэалізацыі праекта склаў каля 910 тысяч рублёў.

На абноўленым стадыёне ёсць усё неабходнае для заняткаў спортам. Гэта пляцоўка з гульнявым полем для міні-футбола, шматфункцыянальная спартыўная пляцоўка з комплексам сілавых трэнажораў і гімнастычных снарадаў для розных узроставых груп, у тым ліку і для людзей з абмежаванымі магчымасцямі.

— Рэканструкцыя стадыёна дае магчымасць сярэдняй школе вырашаць найважнейшую задачу па стварэнні аптымальнага здароўефарміруючага асяроддзя ва ўстанове адукацыі і павышэнні якасці адукацыі навучэнцаў, — адзначыў начальнік галоўнага ўпраўлення адукацыі Гродзенскага аблвыканкама Руслан Абрамчык.

Адразу пасля цырымоніі адкрыцця абноўленае футбольнае поле было апрабавана, як кажуць, на справе. Тут прайшоў таварыскі футбольны матч паміж футбольным клубам “Нёман” і зборнай камандай выпускнікоў школы і гасцей мерапрыемства.

— Думаю, гэта будзе адно з самых папулярных месцаў на нашай малой радзіме. Калі вучыліся тут, мы не тое што школай, мы класам выйгравалі раённыя спаборніцтвы і па футболе, і па баскетболе, і па лёгкай атлетыцы. Таму спадзяюся, што вы падтрымаеце нашу традыцыю і Луцкаўлянская школа будзе лепшай, — адзначыў, звяртаючыся да вучняў, выпускнік Луцкаўлянскай сярэдняй школы старшыня Нацыянальнай дзяржаўнай тэлерадыёкампаніі Рэспублікі Беларусь Іван Эйсмант.

Дарэчы, як адзначыў падчас сустрэчы намеснік старшыні Беларускай федэрацыі футбола Уладзімір Базанаў, чатыры выпускнікі Луцкаўлянскай школы ў розныя гады дасягалі вялікіх футбольных поспехаў — гулялі ў вышэйшай лізе. У госці да школьнікаў ён прыйшоў не з пустымі рукамі. 22 камплекты гульнявой формы і 11 мячоў стануць добрай дапамогай у імкненні дзяцей да вялікіх спартыўных вышынь.

Источник: https://nastgaz.by