Эканомія часу на справаздачнасць і зручнасць маніторынгу паспяховасці: Пётр Красько пра «Электронную школу»

Лічбавізацыю адукацыйнага працэсу, індывідуальныя маршруты для асаблівых дзяцей, комплексны падыход да развіцця юных спартсменаў абмеркавалі з начальнікам упраўлення адукацыі Ваўкавыскага райвыканкама Пятром Красько. Падрабязнасці — у матэрыяле карэспандэнта “Настаўніцкай газеты”.

— Пётр Яўгенавіч, як успрымаецца пераход на “Электронную школу” і педагогамі, і навучэнцамі?

— Укараненне аўтаматызаванай сістэмы ідзе паэтапна: педагогі, навучэнцы, бацькі. Актыўна нарошчваецца функцыя­нал: электронныя журналы, дзённікі, расклад, доступ да матэрыялаў. Педагогі адзначаюць эканомію часу на справаздачнасць і зручнасць маніторынгу паспя­ховасці, а бацькі цэняць празрыстасць вучэбнага працэсу і аператыўную сувязь.

Мы планамерна ўводзім “Электронную школу” ў дзвюх установах адукацыі. Прычым увайшлі ў праект не з нуля — да гэтага ўжо выкарыстоўвалі асобныя лічбавыя інструменты, таму пераход на адзі­ную платформу атрымаўся плаўным. На першым этапе падключылі электронныя журналы і дзённікі — спачатку ў пілотным рэжыме для некалькіх класаў. Гэта дазволіла адпрацаваць тыпавыя сцэнарыі: выстаўленне адзнак, занясенне дамашніх заданняў, фіксацыю пропускаў. Затым маштабавалі сістэму на ўсе паралелі. Цяпер у “Электроннай школе” вядзецца ўлік паспяховасці па ўсіх прадметах, а расклад абнаўляецца цэнтралізавана, што адразу знізіла колькасць бацькоўскіх пытанняў.

Настаўнікам у сістэме зручна захоў­ваць і раздаваць матэрыялы: рабочыя лісты, спасылкі на анлайн-трэнажоры, памяткі. Усе яны знаходзяцца ў адным месцы і даступныя і дзецям, і бацькам, якія таксама хутка асвоіліся. Іх галоўны запыт — празрыстасць і зразумеласць: бачыць адзнакі і дамашнія заданні, ведаць, калі адбудуцца кантрольныя і пазакласныя мерапрыемствы. Цяпер усё гэта навідавоку: апавяшчэнні прыходзяць своечасова, расклад не губляецца, каментарыі настаўнікаў дапамагаюць дакладней зразумець сітуацыю.

Зваротную сувязь атрымліваем рэгулярна: на бацькоўскіх сходах, праз чат класных кіраўнікоў і на сустрэчах з адміністрацыяй. Прапановы па паляпшэнні сістэмы фіксуем і перадаём распрацоў­шчыкам, напрыклад, просьбы зрабіць больш наглядным адлюстраванне прапушчаных заданняў або дабавіць напа­міналкі пра тэрміны здачы работ.

У цэлым стаўленне да сістэмы ва ўстановах пазітыўнае: і педагогі, і бацькі бачаць, што “Электронная школа” — гэта не пра лічбавізацыю дзеля птушачкі, а пра зразумелую штодзённую зручнасць.

Пры гэтым мы захоўваем баланс: лічбавыя прылады дапаўняюць традыцыйную работу, а не замяняюць жывыя зносіны і педа­гагічны падыход.

— Якія мерапрыемствы праводзяцца на згуртаванне ўсіх удзельнікаў адукацыйнага працэсу?

— Ва ўстановах адукацыі Ваўкавыскага раёна вялікая ўвага ўдзяляецца стварэнню атмасферы сяброўства і ўзаемаразумення паміж настаўнікамі, вучнямі і бацькамі. Дзеля гэтага праводзяцца восеньскія кірмашы, навагоднія паказы, вясновыя канцэрты, спартыўныя святы — гэта выдатная нагода сабрацца ўсім разам, праявіць таленты і проста весела правесці час. У творчых майстэрнях удзельнікі сумесна ствараюць вырабы, малюнкі, тэат­ральныя пастаноўкі, што разві­вае крэатыўнасць і вучыць працаваць у камандзе.

Кожны год у нас праводзіцца раённы этап рэспубліканскага конкурсу “Лідар года”. У ім прымаюць удзел лідары дзіцячых і маладзёжных грамадскіх аб’яднанняў, органаў вучнёўскага самакіравання з 18 устаноў агульнай сярэдняй адукацыі. Сёлета раённы этап адбудзецца 14 лістапада. За перамогу пазмагаюцца 18 навучэнцаў ва ўзросце 14—17 гадоў. Гэты конкурс — не проста чарговае мерапрыемства, а сапраўды моцны інструмент для развіцця лідарскіх якасцей. У час спаборніцтва ўдзельнікі дэманструюць свае лепшыя якасці: стратэгічнае мысленне, уменне пры­маць рашэнні, натхняць каманду, вырашаць складаныя задачы. Сам працэс падрыхтоўкі і ўдзел у конкурсе падштурхоўваюць старшакласнікаў да самааналізу і работы над сабой.

— Што дапамагае выхоўваць юных спартсменаў?

— У нашым раёне створана эфектыўная сістэма фізкультурна-аздараўленчай і спартыўна-масавай работы. А забяспечанасць спартыўным інвентаром і абсталяваннем — стапрацэнтная. Для заняткаў спортам працуюць шматпрофільныя пляцоўкі на адкрытым паветры ў ваўкавыскіх сярэдніх школах № 4 і № 7 імя А.І.Барычэўскага, а таксама ў Краснасельскай школе і школе імя Р.І.Шавякова Росі. У дзвюх школах абноўлена асфальтавае пакрыццё бегавых дарожак, а ў школе № 3 імя А.В.Сялюгіна Ваўкавыска поўнасцю рэканструявана спартзала. Дарэчы, усе нашы спартыўныя аб’екты ў вячэрні час, на канікулах і ў выхадныя на працягу трох гадоў загружаны на 98%.

Асаблівая ўвага ўдзяляецца навучанню плаванню: у дзіцячых садах у басейнах займаюцца 405 выхаванцаў, у школах — звыш 2,7 тысячы навучэнцаў. У рамках плавальнага ўсеагульнага навучання адкрыта шэсць профільных аб’яднанняў па інтарэсах. Усяго ж у школах і дзіцячых садах працуюць 106 аб’яднанняў па інтарэсах фізкультурна-спартыўнага профілю, якія наведваюць больш за 1330 дзяцей.

Функцыянуюць два спецыялізаваныя па спорце класы: на базе школы № 7 Ваўкавыска — па футболе, а ў школе Краснасельскага — па гандболе. У планах на 2027/2028 год — адкрыццё класаў па лёгкай атлетыцы, плаванні і валейболе яшчэ ў чатырох школах.

У шосты школьны дзень традыцыйна праходзяць дні здароўя, штоквартальныя дні лёгкай атлетыкі з удзелам бацькоў і штотыднёвыя спартыўныя мерапрыемствы.

Дзякуючы цеснаму супрацоўніцтву школ з дзіцяча-юнацкімі спартшколамі і раённай спартыўнай школай прафсаюзаў юныя ваўкавычане дасягаюць выдатных вынікаў.

Источник: https://nastgaz.by