Звыш тоны бульбы і 1,5 тысячы петуній са школьнага ўчастка. Пра карысныя канікулы ў Зэльвенскім раёне

Педагогі і навучэнцы Зэльвенскага раёна ў час летніх канікул актыўна займаюцца афармленнем прышкольных тэрыторый кветкамі і вырошчваюць сельскагаспадарчыя культуры для абедзеннага меню на будучы навучальны год. Падрабязнасці — у матэрыяле карэспандэнта “Настаўніцкай газеты”.

У падпарадкаванні толькі Князеўскай сярэдняй школы знаходзіцца каля трох гектараў зямлі, і значную частку гэтай тэрыторыі займае вучэбна-доследны ўчастак. Сумеснымі намаганнямі настаўнікі і вучні вырошчваюць тут нямала агародніны, якая восенню становіцца часткай абедзеннага меню школьнікаў.

— Наш ураджай ідзе на зніжэнне кошту харчавання дзяцей і дапамагае зрабіць порцыю больш разнастайнай і збалансаванай. Напрыклад, у 2023 годзе мы нарыхтавалі 300 кг капусты, паўтары тоны бульбы і па 200 кг цыбулі, морквы і буракоў. Істотным быў і фруктовы ўклад: у няўра­джайны год сабралі больш за 100 кг яблыкаў, — адзначае загадчыца вучэбна-доследнага ўчастка Князеўскай сярэдняй школы Людміла Рудая.

Яблыневы сад, дарэчы, тут быў закладзены яшчэ ў год заснавання ўстановы адукацыі — у 80-я гады мінулага стагоддзя. З таго часу ён не раз абнаўляўся новымі саджанцамі і сёння шчодра частуе школьнікаў ураджаем.

Улетку пад кіраўніцтвам Людмілы Рудой дзеці з Князева і навакольных вёсак спяшаюцца ў школу для праходжання практыкі. Іх увага засяроджана галоўным чынам на праполцы сельгаскультур. Але ва ўстанове да працы на зямлі прывучаюць круглы год. На працягу навучальнага года ў раскладзе школьнікаў з 5 па 11 клас ёсць прадмет “Грамадска карысная праца”. І школьнікі ў Князеве з юных гадоў ведаюць, як падрыхтаваць глебу да пасадкі, пасеяць розныя культуры і правільна арганізаваць паліў.

Вучэбна-доследны ўчастак сельскай школы ўключае ­шэсць раздзелаў і, акрамя вырашэння харчовых задач, выконвае ў тым ліку эстэтычныя. На ўчастку “Дэндрарый”, напрыклад, прадстаўлена 15 відаў дрэў, уключаючы экзотаў — кедры. Упрыгожваюць прышкольную тэрыторыю каля 20 відаў дэкаратыўных кустоў. Ёсць тут і свой ружоўнік, які на працягу лета радуе мясцовых жыхароў цвіценнем каля 30 чайных руж.

— Усе гэтыя расліны патрабуюць вялікай увагі на працягу ўсяго года. Нашы вучні даўно засвоілі: без працы тэрыторыя школы не парадуе вока прыгажосцю, — дадае настаўніца біялогіі Ларыса Лабовіч.

Падчас навучальнага года яна, дарэчы, актыўна далучае школьнікаў не толькі да догляду раслін, але і выкарыстоўвае пэўныя аддзелы ўчастка ў адукацыйных мэтах. Мноства раслін становяцца аб’ектамі вывучэння ў рамках даследаванняў школьнікаў. А сямікласнікі на ўроках біялогіі з відавой разнастайнасцю раслін знаёмяцца не толькі са старонак падручнікаў.

— У мінулым годзе з чатырох выпускнікоў групы аграрнай накіраванасці трое для паступлення выбралі профільныя ўніверсітэты Гродна і Мінска, — дадае Ларыса Лабовіч, якая вяла ў вучняў старшых класаў тэматычны факультатыў.

З аграрнай накіраванасцю ў школе арганізавалі і бізнес-кампанію “АграKIDS”.

— Пакуль мы яшчэ на старце гэтай работы. Другі год у асноўным для патрэб установы адукацыі займаемся вырошчваннем кветак. Каля сотні петуній, якія сёння ўпрыгожваюць школьную тэрыторыю, разам з пяццю маімі выпускніцамі вырасцілі з насення. Прычым збіралі і размяркоўвалі насенне па колерах таксама самі, — расказвае настаўніца фізікі Вольга Белец, адказная за рэалізацыю школьнай бізнес-кампаніі.

Больш за 50 відаў кветак сёння расце на тэрыторыі яшчэ адной установы адукацыі раёна — сярэдняй школы № 3 Зэльвы. Больш за тое, сёлета тут прыклалі нямала намаганняў для кветкавага афармлення райцэнтра.

— У цяпліцах толькі для рэалізацыі Зэльвенскай жыллёва-камунальнай гаспадарцы вырасцілі каля 350 петуній, 140 лабелій і 100 колеусаў, а таксама пеларгоніі і гацаніі. Прыемна разумець, што ўся гэтая кветкавая разнастайнасць будзе ўпрыгожваць клумбы пасёлка і радаваць сваімі фарбамі гасцей і жыхароў райцэнтра, — гаво­рыць дырэктар школы Кацярына Ігнатавец.

Усяго ж толькі петуній у школе сёлета вырасцілі каля паўтары тысячы. Частка раслін шчодра ўпрыгожвае тэрыторыю школы, частка — у якасці прыемнага бонусу перададзена прадпрыемствам, якія аказвалі школе спонсарскую дапамогу.

— Упрыгожваюць нашы петуніі і дзіцячы аздараўленчы лагер “Блакітная хваля”, — працягвае суразмоўніца.

Кіраўнік установы адукацыі вельмі любіць кветкі і сумесна з неабыякавымі педагогамі і дзецьмі імкнецца да таго, каб тэрыторыя школы квітнела круглы год, пачынаючы з пралесак і цюльпанаў вясной і заканчваючы восеньскімі вяргінямі. Па словах дырэктара, для гараджан тэрыторыя каля школы — своеасаблівы парк на адлегласці выцягнутай рукі ў спальным мікрараёне Зэльвы, кожны вечар сюды прыходзяць сем’ямі.

Ёсць тут нават свой сад ценяў. Побач з высокімі прадстаўнікамі іглічных дрэў удала суседнічаюць першацветы і медуніца.

— Камфортныя ўмовы ствараем не толькі для дзяцей, але і для кветак на ўчастку, — з жартам заўважае кіраўнік установы адукацыі.

Важна адзначыць, што кожны куток вучэбна-доследнага ўчастка школы служыць у тым ліку адукацыйнай мэце. Тут ладзяць экскурсіі для школьнікаў. Ёсць ва ўстанове адукацыі і профільная група хіміка-біялагічнай накіраванасці, вучні якой на школьных экапрасторах — самыя частыя госці.

— Не першы год вырошчваем нават свае памідоры. Пасля адпаведных даследаванняў у санстанцыі ў жніўні наш турыстычны лагер звычайна забяспечаны ўраджаем таматаў. А ў маладым садзе садавінна-ягаднага аддзела вучэбнага ўчастка сёння растуць не толькі яблыні і грушы — праз год-другі плануем са­браць тут першы ўраджай персікаў. Маладыя саджанцы ўжо год актыўна набіраюць сілу, — гаворыць кіраўнік вучэбна-доследнага ўчастка настаўніца біялогіі Святлана Клімчук.

Лета для школьнікаў сярэдняй школы № 3 Зэльвы — час актыўнай працы на школьным участку. Размова не толькі аб практыцы па графіку пяць дзён па тры гадзіны. Кожнае лета ў школе працуе вытворчая брыгада. Для дзяцей гэта магчымасць атрымаць у тым ліку вопыт распараджэння першымі сродкамі, заробленымі сваёй працай.

Источник: https://nastgaz.by