У Гродне юныя ракетамадэлісты незвычайна павіншавалі вайскоўцаў

Выхаванцы лабараторыі ракетна-касмічнага мадэлявання Гродзенскага абласнога цэнтра тэхнічнай творчасці напярэдадні 23 лютага павіншавалі ў цікавай форме вайскоўцаў 557-й інжынернай брыгады, паведамляе карэспандэнт «Настаўніцкай газеты».

З пляца ўзнялася сканструяваная юнымі ракетамадэлістамі і іх таленавітым педагогам Аляксандрам Ліпаем мадэль з тэматычным віншаваннем і шаўронам воінскай часці.

— Гэтае мерапрыемства для нас стала ўжо традыцыйным. Кожны год напярэдадні Дня абаронцаў Айчыны і Узброеных Сіл Рэспублікі Беларусь бываем у розных воінскіх часцях горада, — адзначыў педагог.

Па цяперашнім адрасе «ракета-віншавальнага» запуску выхаванцы А. Ліпая гасцявалі не ўпершыню. З 2013 г. тут захоўваюць мадэль вучнёўскай ракеты, якая паднімалася ўжо ў неба над пляцам.

Удзельнікамі мерапрыемства сталі не толькі юныя ракетамадэлісты, але і навучэнцы шчучынскай СШ № 3. Падчас сустрэчы ваеннаслужачыя расказалі хлопцам аб перспектывах службы ў арміі, адказалі на пытанні, арганізавалі экскурсію па часці. Выхаванцы А. Ліпая, у сваю чаргу, падрыхтавалі незвычайны сюрпрыз для салдат тэрміновай службы: разыгралі сярод іх касмічную латарэю. Яе пераможца па ўзгадненні з кіраўніцтвам часці атрымаў пазапланавае звальненне.

— Заўсёды рады бачыць на тэрыторыі нашай часці дзяцей з любых устаноў адукацыі вобласці: ці гэта вучні нашай падшэфнай гродзенскай СШ № 15 імя Д.М. Карбышава, дзе адкрыты ваенна-патрыятычны клуб, ці сённяшнія госці з цэнтра тэхнічнай творчасці, якія вырашылі арыгінальна павіншаваць ваеннаслужачых з Днём абаронцаў Айчыны. Прыемна, што хлопцы ў такой цікавай форме развіваюць творчае мысленне, — падзяліўся камандзір 557-й інжынернай брыгады палкоўнік Алег Івашка.

Зрэшты, падчас віншавальнай сустрэчы два юныя ракетамадэлісты — Раман Ляпеша і Ягор Савіцкі — атрымалі з рук камандавання воінскага падраздзялення пасведчанні кандыдатаў у майстры спорту па ракетамадэльным спорце.

***

Сёння ў аб’яднанні па інтарэсах абласнога цэнтра тэхнічнай творчасці ракетамадэляваннем займаецца 21 чалавек. Узрост захопленых гэтай справай дзяцей розны. Ёсць і вучні пачатковых класаў, і студэнт ГрДУ імя Янкі Купалы Ілья Руткоўскі. Педагог А. Ліпай шчыра гаворыць, што яго выхаванцы — заўсёды нагода для гордасці. Дарэчы, І. Руткоўскі прыйшоў у цэнтр, калі яму было 6, а праз гады цікавых заняткаў першым у Беларусі запусціў у неба мадэль, якая была раздрукавана на 3D-прынтары. Ён жа з’яўляецца пераможцам рэспубліканскай спартакіяды «ТэхнаСпорт» і прызёрам конкурсу навукова-тэхнічнай творчасці навучэнцаў Саюзнай дзяржавы «Таленты XXI стагоддзя».

Трэба сказаць, падчас заняткаў з А. Ліпаем дзеці не толькі збіраюць уласныя мадэлі, але і знаёмяцца з гісторыяй развіцця космасу. Таму з асаблівымі пачуццямі ставяцца да магчымасці пабываць на знакамітым касмадроме Байканур. І дзякуючы таленавітаму педагогу такая магчымасць у хлопчыкаў і дзяўчынак ёсць. Пачынаючы з 2006-га Аляксандр Мікалаевіч нязменна возіць туды сваіх выхаванцаў на турніры.

— На адным з апошніх міжнародных спаборніцтваў «Кубак Байканура», у верасні мінулага года, Глеб Цалюк заваяваў другое месца сярод юнакоў і трэцяе сярод дарослых. Гэта сярод 97 спартсменаў, — адзначыў педагог.

Што тычыцца яго самога, з ракетамадэльным спортам ён звязаны з дзесяцігадовага ўзросту. Спачатку майстраваў мадэлі як вучань. Падчас службы на флоце азнаёміўся ўжо з сапраўднымі ракетамі. У 1991-м вярнуўся на малую радзіму і з таго часу шчыра дзеліцца сваёй любоўю да мадэлявання з членамі тэматычнага гуртка абласнога цэнтра тэхнічнай творчасці.

Источник: https://nastgaz.by