Вучаніца 9 класа Астрынскай сярэдняй школы імя А.С. Пашкевіч (Цёткі) Ілона Фірыновіч стала лепшым экскурсаводам у рэспубліцы ў намінацыі “Літаратурны профіль”!

Ілона Фірыновіч – вучаніца 9 класа Астрынскай сярэдняй школы імя А.С. Пашкевіч (Цёткі), стала пераможцай рэспубліканскага конкурсу юных экскурсаводаў музеяў устаноў адукацыі-2025 у намінацыі “Літаратурны профіль”.

– Ілона – дзяўчынка рознабаковая, – расказвае кіраўнік народнага музея А.С. Пашкевіч (Цёткі) Ала Балобан, якая ўжо сорак год з’яўляецца яго захавальніцай. – Яна захапляецца роднай мовай, займаецца ў школе мастацтваў на музычным аддзяленні па класе “баян”. Яшчэ ў пятым класе Ілона ўвайшла ў склад савета музея і з той пары з’яўляецца экскурсаводам. Але спачатку дзяўчынка прыйшла не ў музей, адразу, так бы мовіць, яна адкрыла для сябе Цётку. У 2021 годзе, калі адзначалася 145-годдзе вялікай пісьменніцы, быў аб’яўлены раённы конкурс на лепшае дэкламаванне верша Алаізы Пашкевіч. Ілона заняла другое месца і атрымала дыплом і падарунак. Цяпер дзяўчынка вядзе аглядныя экскурсіі ў музеі, а таксама тэматычную экскурсію пра апошнія гады жыцця Цёткі.

– Я вельмі многа ведаю пра жыццё і творчасць нашай знакамітай зямлячкі, – гаворыць Ілона. – І хоць музей у школе існуе ўжо многа год, пошукавая работа працягваецца. У музеі прадстаўлены чатыры экспазіцыі, якія яднае яркая зорка Алаізы Пашкевіч. Першая экспазіцыя “Стала песняй у народзе” расказвае пра жыццёвы і творчы шлях Цёткі. Другая – “Жыве яе ліра нанова” – распавядае пра пісьменнікаў Гродзеншчыны, якія пайшлі сцяжынкай, пратаптанай славутай зямлячкай. Як жылі людзі ў канцы 19 – пачатку 20 стагоддзя можна даведацца з трэцяй экспазіцыі “Сведкі мінуўшчыны”. А ў чацвёртай – “Тут родзіцца думка за думкай” – сабраны матэрыялы пра тое, як развівалася адукацыі ў Астрыне. Цётка заўсёды марыла, каб усе дзеткі маглі вучыцца, і прыкладала для гэтага шмат намаганняў: адкрывала школкі для бедных дзяцей, арганізоўвала настаўніцкія курсы, выдала першыя чытанні для дзетак-беларусаў.

Народны музей А.С. Пашкевіч (Цёткі) з цікавасцю наведваюць і дарослыя, і дзеці не толькі з нашай краіны. Не адзін раз там бывалі госці з Масквы, з Калінінграда, з іншых расійскіх гарадоў. І што адметна, многія просяць праводзіць экскурсіі менавіта на беларускай мове. З 2006 года ўвесь матэрыял, які сабраны ў музеі пра Цётку, размешчаны ў адной зале.

Рашэнне прыняць удзел у конкурсе юных экскурсаводаў Ілона і Ала Сямёнаўна прымалі разам. Увогуле, гэты тандэм вучня і настаўніка аказаўся вельмі творчым і рэзультатыўным. Першае месца ў раённым этапе конкурсу, затым перамога ў абласным этапе, які складаўся з двух тураў. У першым завочным туры ўдзельнікі конкурсу прадстаўлялі тэматычную відэа-экскурсію “Музей у чамадане”, а таксама дасылалі 3 назвы тэм экскурсій для ўдзелу ў вочным этапе. У вочным туры ўдзельнікі конкурсу прадстаўлялі тэматычную экскурсію “Музей у чамадане”, тэма якой вызначалася журы і агучвалася непасрэдна перад правядзеннем тура, і аглядную экскурсію ў форме рэкламы музея. Аналагічна праходзіў і заключны, рэспубліканскі этап конкурсу. Прадстаўнікі ўсіх абласцей і Мінска сабраліся ў рэспубліканскім цэнтры экалогіі і краязнаўства.

– Мне было зусім не складана прымаць удзел у конкурсе юных экскурсаводаў, – працягвае Ілона. – Хваляванне крыху было, але я выдатна ведаю тэкст усіх сваіх экскурсій, а таксама вершы Цёткі, таму, выступаючы ў Мінску, з задавальненнем правяла аглядную экскурсію на працягу 7 мінут у форме рэкламы, каб выклікаць у слухачоў цікавасць да нашага музея з яго адметнасцямі і ўнікальнасцю. Па ўсім відаць, мне гэта ўдалося. Што аказалася складаным – укласціся ў сем хвілін. Напярэдадні конкурсу мы шмат трэніраваліся, каб сумець усё расказаць менавіта за гэты час.

– Ілона выступіла выдатна! – дзеліцца сваімі ўражаннямі Ала Сямёнаўна. – Такая крэатыўная, эмацыянальная, яна пачынае расказваць і сама раскрываецца перад слухачамі, нібы разам з Цёткай крочыць па яе жыцці.

– Я вельмі рада, што змагла выступіць дастойна, што наша школа і музей загучалі на ўзроўні рэспублікі, – гаворыць Ілона. – А яшчэ мая перамога стала выдатным падарункам для маёй бабулі, якая якраз у той дзень адзначала свой дзень нараджэння і разам з мамай і татам вельмі за мяне хвалявалася. Мне цікава быць экскурсаводам і знаёміць дзяцей і дарослых з цікавымі фактамі з жыцця нашай зямлячкі, нашай выдатнай знакамітай пісьменніцы. Чакаем усіх у нашым музеі!

Источник: https://dzyannica.by