Любімым настаўнікам ад любімых былых вучняў: пра добрую традыцыю ў Дзятлаўскім раёне

“Любімы вучань — любімаму настаўніку” — пад такім дэвізам у Дзятлаўскім раёне штогод праходзіць ушанаванне педагогаў­-ветэранаў, прымеркаванае да Дня настаўніка і Дня пажылых людзей.  Пра гэта карэспандэнту “Настаўніцкай газеты” расказала Раіса Аляксандраўна Ганчарэвіч, выдатнік адукацыі, старшыня Дзятлаўскага раённага савета ветэранаў працы пры Дзятлаўскай раённай арганізацыі Беларускага прафесійнага саюза работнікаў адукацыі і навукі.

У 2022 годзе педагог была занесена ў Кнігу славы Дзятлаўскага раё­на. Сваю працоўную дзей­насць яна пачала ў 1967 годзе: прайшла шлях ад старшай піянерважатай і настаўніка пачатковых класаў да намесніка загадчыка аддзела адукацыі Дзятлаўскага райвыканкама.

Сёння ветэранская арганізацыя сістэмы адукацыі раёна налічвае 354 ветэраны педагагічнай працы. У іх ліку выдатнік адукацыі ўладальнік ордэна “Знак Пашаны” Яўгенія Рыгораўна Савань — намеснік старшыні раённага савета ветэранаў працы. Сёння яна прымае актыўны ўдзел у грамадскім жыцці раёна, выступае перад моладдзю, праводзіць урокі мужнасці, перадае вопыт маладым настаўнікам. Вельмі ўважлівая да кожнага: усіх без выключэння ветэранаў педагагічнай працы раёна яна штогод віншуе з днём нараджэння. Можна ўя­віць, як людзі чакаюць яе тэлефоннага званка!

Сярод заслужаных людзей раёна і 92-гадовая настаўніца Валянціна Іосіфаўна Русіна, якая працавала ў дзіцячым доме Дзятлава. За сваю работу была ўдастоена ордэна Працоўнага Чырвонага Сцяга. Былыя выхаванцы дзіцячага дома, кожнаму з якіх яна падарыла сваю любоў, падтрымліваюць з ёй зносіны і сёння. 

Медалём “За працоўную доб­лесць” была ўзнагароджана і настаўніца матэматыкі Лілія Ула­дзіміраўна Баравік. На пенсіі жанчына ўдзельнічае ў раённым хоры ветэранаў. А педагог Валянціна Іванаўна Скок арганізавала на базе Дварэцкага сельскага Савета і Дома культуры клуб “У коле сяброў” для мясцовых жыхароў, якія праяўляюць сябе ў творчасці. Былы дырэктар Аркадзь Мяфодзьевіч Сокал мае талент мастака, на заслужаным адпачынку піша карціны, майструе вырабы з дрэва і ладзіць выставы.  

Варта ўзгадаць і імя Тамары Уладзіміраўны Крывені — нязменнага дырэктара народнага гісторыка-краязнаўчага музея “Дзеці ліхалецця” Новаяльнянскай сярэдняй школы, які быў створаны ў 1986 годзе.

— У нашым раёне звычайна ў адзін дзень святкуюцца і Дзень настаўніка, і Дзень пажылых лю­дзей, — адзначыла Раіса Аляк­сандраўна. — У першай палове дня на базе школ або гімназіі Дзятлава праходзіць свята для ветэранаў раёна. Калектывы ўстаноў адукацыі рыхтуюць канцэртныя праграмы, выпускаюць насценгазеты аб педагогах-ветэранах, якія ў завяршэнні ўрачыстасці ім до­раць, арганізуюць чаяванні, сустрэчы з моладдзю. У другой палове дня свята працягваецца ў мясцовым Доме культуры. І яно ўжо прымеркавана да Дня настаўніка, праводзіцца для ўсіх педагогаў раёна — і цяперашніх, і тых, хто доўгія гады працаваў у сістэме. 

Такіх сустрэч ветэраны чакаюць з вялікім нецярпеннем, стараюцца не прапусціць, рыхтуюцца. Кожны год збіраецца па 120—150 чалавек. Для ўдзельнікаў мерапрыемстваў з аддаленых населеных пунктаў арганізаваны падвоз. Пра тое, што настаўнікі, нават на пенсіі, заўсёды ў пашане, гаворыць той факт, што на гэтых святах заўсёды прысутнічаюць прадстаўнікі ўлады і грамадскасці. За 13 гадоў існавання нашай арганізацыі рознага ўзроўню ўзнагародамі былі адзначаны 292 педагогі-ветэраны, з іх граматамі райвыканкама і райсавета — 83 чалавекі. Ушаноўваюцца і юбіляры: ва ўрачыстай атмасферы ім уручаюць каштоўныя падарункі, для іх гу­чаць віншаванні калег і навучэнцаў, песні і вершы. Педагогі-ветэраны выступаюць са сваімі творчымі нумарамі. Ад усёй душы такім сустрэчам радуецца самы заслужаны, самы старэйшы педагог раёна 96-гадовая выдатнік адукацыі Еўдакія Рыгораўна Улога, якая шчыра ўпэўнена: “Я, можа быць, і жыву ад таго, што чакаю кожны год гэтае свята сустрэчы з калегамі”.

Ёсць у Дзятлаўскім раёне і добрая традыцыя дарыць падарункі любімым настаўнікам ад любімых былых вучняў. У кожнага педагога з вялікім стажам шмат выхаванцаў, якія ўспамінаюць іх з удзячнасцю. Раённы савет ветэранаў напярэдадні значных дат звяртаецца да супрацоўнікаў розных мясцовых арганізацый з прапановамі павіншаваць сваіх любімых настаўнікаў. Іх вучні з радасцю адгукаюцца.   

Раіса Аляксандраўна Ганчарэвіч дзякуе ўсім нераўнадушным людзям, хто дапамагае штогод у арганізацыі незабыўных сустрэч да Дня настаўніка і дня мудрых людзей — педагогаў — так неафіцыйна называюць свята пажылых у Дзятлаўскім раёне. 

Работа з педагогамі залатога ўзросту ў раёне прымеркавана не толькі да свят. Яна штодзень вядзецца ва ўсіх установах адукацыі Дзятлаўшчыны, дзе створаны пярвічныя ветэранскія арганізацыі.

Источник: https://nastgaz.by