Як павысіць пазнавальнасць спартыўнага брэнда ўстановы адукацыі, ведаюць у Клайшанскай базавай школе

У Клайшанскай базавай школе Воранаўскага раёна прыярытэтным напрамкам з’яўляецца далучэнне дзяцей да спартыўна­-масавай і фізкультурна-­аздараўленчай работы. З велізарным энтузіязмам у гэтую дзейнасць уцягнуты школьнікі, іх бацькі і жыхары вёскі. Але больш за ўсё намаганняў прыкладаюць педагогі. Падрабязнасці – у матэрыяле карэспандэнта “Настаўніцкай газеты”.

Адзін з такіх педагогаў — настаўніца фізічнай культуры і здароўя Ірына Чаславаўна Вараноўская. Маючы 35-гадовы працоўны стаж, яна кіруе раённым вучэбна-метадычным аб’яднаннем настаўнікаў фізічнай культуры і здароўя.

— Наша школа — асноўны цэнтр мікрараёна па фарміраванні культуры здаровага ладу жыцця. Ахова здароўя вучняў уключае ў сябе шмат паказчыкаў, у тым ліку стварэнне ўмоў для заняткаў фізічнай культурай і спортам. Акрамя таго, адна з галоўных задач “Канцэпцыі бесперапыннага выхавання дзяцей і моладзі” — авалоданне ведамі і каштоўнасцямі здаровага ладу жыцця. На працягу апошніх гадоў наша ўстанова адукацыі — прызёр раённай спартакіяды ў сваёй падгрупе, — расказвае Ірына Чаславаўна.

Цікава ведаць, што вучні Клайшанскай базавай школы займалі першыя месцы ў раёне 11 разоў. У 2017—2020 гадах у школе рэалізавалі рэспубліканскі інавацыйны праект “Укараненне мадэлі фарміравання рухальнай культуры суб’ектаў адукацыйнай прасторы сельскай школы”. Падчас рэалізацыі праекта паспяхова дзейнічала школа руху “Тэмп”. Так, апрабавалі методыку індывідуалізацыі рухальных рэжымаў сельскіх школьнікаў і прадстаўнікоў іх найбліжэйшага сацыяльнага асяроддзя на сумесных занятках у секцыі агульнай фізічнай падрыхтоўкі. Яшчэ быў распрацаваны дыдактычны матэ­рыял у праграме Microsoft Excel для аўтаматычнага падліку пробы Руф’е, ацэнкі даных узроўню фізпадрыхтоўкі, ацэнкі фізічнага развіцця і функцыя­нальнага стану. Па выніках інавацыйнага праекта ва ўстанове адукацыі прыжылася такая форма работы ў шосты школьны дзень, як субота “Со-бытие”. Гэта не проста эмацыянальна насычаная справа, якая патрабуе дбайнай падрыхтоўкі і прыцягнення сацыяльных партнёраў. Напрыклад, дзецям вельмі спадабалася квест-гульня “Армейскі сакрэт” з удзелам работнікаў паг­ранічнай заставы “Забалаць”.

— Каб павысіць рухальную актыў­насць дзяцей, у школьным двары арганізавана зона “Гульні на асфальце”, а ўнутры школы абсталяваны “Сенсорны калідор”. Туды ўваходзяць інтэрактыўныя дарожкі на падлозе, дзе навучэнцы могуць бегаць і ска­каць. Гэтыя зоны папулярныя сярод школьнікаў. Таксама ў калідорах старшага звяна ўстаноўлены сталы для гульняў у шашкі, каля якіх замест крэслаў стаяць стэп-платформы, дыскі здароўя або фітбол. Гульня ў шашкі праходзіць па прынцыпе запатэнтаванай у Расіі гульні “Інфіт”. Сутнасць яе ў тым, што пакуль сапернік абдумвае ход, іншы ўдзельнік выконвае фізічныя практыкаванні, — тлумачыць настаўніца фізічнай культуры і здароўя.

Стала добрай традыцыяй правядзенне ў кожнай чвэрці тыдня здаровага ладу жыцця. Такі тыдзень мае незвычайную структуру, дзе кожны дзень прысвечаны пэўнаму складніку паняцця “здароўе”. Выкарыстоўваюцца віды дзейнасці, якія робяць кожны дзень непаўторным. Што важна, такія мерапрыемствы не перашкаджаюць вучэбнаму працэсу. Нешта праводзіцца падчас перапынкаў у рэкрэацыях школы, а нешта — у кабінетах у пазаўрочны час.

Адміністрацыя школы не забывае пра крэатыў. На тэрыторыі школы ўсталяваны арт-аб’ект у выглядзе футбольнага мяча. Гэта прыцягвае ўвагу ўсіх навакольных і павышае пазнавальнасць брэнда ўстановы адукацыі.

— Вельмі вынікова праходзіць летні перыяд. У чэрвені мінулага года 93% школьнікаў схадзілі ў турыстычныя паходы. Былі прапанаваны новыя формы арганізацыі актыўнага адпачынку падчас экскурсій. Дзеці наведалі батутны цэнтр у Гродне, цір у Парэччы, аквапарк “Азёрны” і вяровачны гарадок на базе “Прывал”. Запатрабаванымі сталі спартыўныя квесты, што нядзіўна. Іх прайшлі 82% навучэнцаў 2—6 класаў. Праведзена 7 гульняў у розных варыянтах: квест з запіскамі, з картай, па дарожных знаках, фотаквест, геаквест. Спартыўныя квесты паказалі, што дзеці не толькі атрымалі новыя веды з розных сфер жыцця і павысілі рухальную актыўнасць, але і набылі вопыт работы ў камандзе, павялічылі пазнавальнасць, — адзначыла дырэктар Клайшанскай базавай школы Алена Іосіфаўна Мікша.

Не першы год у школе працуе секцыя агульнай фізічнай падрыхтоўкі па методыцы індывідуалізацыі рухальных рэжымаў. Там дзеці робяць фізічныя практыкаванні неабходную колькасць разоў і ў патрэбным тэмпе. Дарэчы, абавязковым момантам у кожным вучэбным дні з’яўляецца правядзенне зарадкі і рухавых перапынкаў з музычным суправаджэннем. Спартыўныя гульні ў рамках аднаго віду спорту арганізоўваюцца ў алфавітным парадку. Гэта стварае дадатковую інтрыгу і матывацыю да ўдзелу. У цяперашні час ва ўстанове адукацыі настаўнікамі пачатковых класаў укаранёны такія здароўе­зберагальныя тэхналогіі, як пальчыкавыя гульні, дыхальная гімнастыка і музыкатэрапія. Гэтыя гульні да­юць магчымасць першакласнікам развіваць рух пальцаў, а кісці рук дзяцей набываюць сілу, добрую рухомасць і гнуткасць.

— Практыкаванні дыхальнай гімнастыкі развіваюць адпаведную мускулатуру, каардынацыю рухаў, мышцы рук і пазваночніка, а танцавальныя прыёмы музыкатэрапіі выкарыстоўваюцца ў якасці фізкультхвілінак на любых занятках і пры правядзенні дынамічнай гадзіны ў групе прадоўжанага дня, што стымулюе фізіялагічныя працэсы і паляпшае настрой, — расказвае Алена Іосі­фаўна. 

У планах на будучыню — укараненне ў школе здароўезберагальных тэхналогій, такіх як твіст-тэрапія, а таксама выкарыстанне фітнес-тэхналогій — стэп-аэробікі і фітбол-аэробікі.

Адміністрацыя школы зацікаўлена ў тым, каб апраба­ваць спартыянскія тэхналогіі фізічнага і духоўнага азда­раўлення дзяцей і мола­дзі аўтарства Уладзіслава Сталярова. Спартыянскія гульні — комплекс спаборніцтваў і конкурсаў пад назвай “Спарт”, што расшыфроўваецца як “спаборніцтвы прыхільнікаў актыўнай рознабаковай творчасці”. Спаборніцтвы, якія ўвахо­дзяць у гэты комп­лекс, гарманічна аб’ядноўваюць спорт з мастац­твам, пры гэтым ацэньваюцца параметры фізічнага і духоўнага развіцця.

Источник: https://nastgaz.by/