Каля 48 тыс. дзяцей плануецца аздаравіць на Гродзеншчыне падчас летніх канікул
13.06.2023У Гродзенскай вобласці будзе працаваць каля 720 лагераў як з кругласутачным, так і з дзённым знаходжаннем. Школьнікаў прымуць 23 стацыянарныя лагеры з кругласутачным знаходжаннем, каля 490 — з дзённым знаходжаннем, каля 80 — палатачных кругласутачных, 57 — працы і адпачынку, 44 — ваенна-патрыятычныя, 95 — спартыўна-аздараўленчых. Вялікая ўвага ўдзяляецца адпачынку дзяцей-сірот і тых, хто застаўся без апекі бацькоў, больш як 1260 з іх адправяцца ў лагеры. Адпачнуць і 308 дзяцей-інвалідаў.
— Асноўнае, на што звяртаецца ўвага ўсіх, хто займаецца арганізацыяй дзіцячага адпачынку і аздараўлення, — захаванне жыцця і здароўя хлопчыкаў і дзяўчынак, — падкрэсліла загадчыца аддзела методык і тэхналогій дадатковай адукацыі Гродзенскага дзяржаўнага абласнога палаца творчасці дзяцей і моладзі Валянціна Сегень. — Выхаваўча-аздараўленчыя ўстановы адукацыі Гродзенскай вобласці ствараюць умовы не толькі для паўнавартаснага адпачынку і аздараўлення, але і для рознабаковага сацыяльнага развіцця выхаванцаў.
Будзе прадоўжана практыка работы абласных профільных лагераў “Навука”, “Піянер”, “Лідар”, для навучэнцаў аграрных і педагагічных класаў “Прафстарт”, эколага-біялагічнага і тэхнічнага профіляў “Свет навукі”. Ужо чацвёрты год запар матываваных на атрыманне ваеннай спецыяльнасці юнакоў і дзяўчат прымае лагер “Юны кадэт” на базе Гродзенскага абласнога кадэцкага вучылішча. Карыстаюцца попытам сярод старшакласнікаў лагеры працы і адпачынку, таму іх рабоце таксама надаецца асаблівае значэнне. Дарэчы, як і рабоце лагераў ваенна-патрыятычнага профілю: запланавана адкрыццё каля 44 лагераў і атрадаў, у тым ліку на базе вайсковых часцей, пагранічных застаў. Выкарыстоўваецца практыка арганізацыі палатачных лагераў на базе загарадных стацыянарных.
На працягу летняй аздараўленчай кампаніі будзе ажыццяўляцца метадычнае суправаджэнне выхаваўчай работы ва ўсіх дзіцячых аздараўленчых лагерах. Падабраны педагогі, праведзена іх падрыхтоўка. На базе Гродзенскага абласнога інстытута развіцця адукацыі былі арганізаваны курсы павышэння кваліфікацыі кіраўнікоў аздараўленчых лагераў і педагагічных работнікаў “Зместавы кампанент арганізацыі дзейнасці дзяцей у летні перыяд: выхаванне і аздараўленне”.
Метадысты Гродзенскага дзяржаўнага абласнога палаца творчасці дзяцей і моладзі правялі курс “Школа важацкага майстэрства” для студэнтаў Гродзенскага дзяржаўнага ўніверсітэта імя Янкі Купалы. Таксама імі распрацоўваецца зборнік метадычных рэкамендацый у дапамогу арганізатарам летняга адпачынку.
— У гэтым годзе зроблены акцэнт на ідэалагічным, грамадзянскім і ваенна-патрыятычным выхаванні, будзе прадоўжана работа па рэалізацыі плана мерапрыемстваў, прымеркаваных да Года міру і стварэння, — адзначыла Валянціна Сегень. — Асаблівая ўвага ўдзяляецца датам, звязаным са знакавымі падзеямі ў гісторыі Беларусі, якія маюць асаблівае гістарычнае і грамадска-палітычнае значэнне. Будзе працягнута рэалізацыя інфармацыйна-адукацыйнага праекта “ШАГ”.
Рэспубліканскую акцыю “Правільнае лета” пад дэвізам “Сонечна, радасна, класна — лета пройдзе не дарма!” падтрымаюць і на Гродзеншчыне. Запланаваны такія мерапрыемствы, як інфармацыйна-метадычны праект “Час яркіх ідэй”, выязныя метадычныя інтэнсівы, анлайн-эстафета выхаваўча-аздараўленчых устаноў адукацыі “Я, ты, ён, яна — разам цэлая краіна” і інш.
Падчас канікул будуць працаваць 28 устаноў дадатковай адукацыі дзяцей і моладзі, дваровыя пляцоўкі па месцы жыхарства.
Источник: https://nastgaz.by/