Дыялогавая пляцоўка з удзелам парламентарыя Аляксандра Сонгіна прайшла ў СШ №1 у Карэлічах

У дзяржаўнай установе адукацыі «Сярэдняя школа № 1 г.п. Карэлічы» праведзена дыялогавая пляцоўка на тэму: «Прафесія настаўніка: учора, сёння, заўтра», паведамляе polymia.by.

Удзельнікі сустрэчы — член Пастаяннай камісіі па заканадаўстве Палаты прадстаўнікоў Нацыянальнага сходу Рэспублікі Беларусь Аляксандр Сонгін, вопытныя і маладыя педагогі, вучні педагагічных груп устаноў адукацыі раёна.

У Аляксандра Сонгіна — багатая педагагічная біяграфія: у мінулым настаўнік Далекскай базавай школы, дырэктар ДУА «Гудскі вучэбна-педагагічны комплекс дзіцячы сад — базавая школа» Лідскага раёна, начальнік упраўлення адукацыі Лідскага раённага выканаўчага камітэта, начальнік Галоўнага ўпраўлення адукацыі Гродзенскага абласнога  выканаўчага камітэта.

— Самае галоўнае ў жыцці — стаць сапраўдным чалавекам і дастойным грамадзянінам, — перакананы парламентарый і выказаў упэўненасць, калі юнакі і дзяўчаты атрымаюць у будучым прафесію настаўніка, у іх усё атрымаецца. Для гэтага трэба адказна і дакладна выконваць свае абавязкі.

З асаблівай цеплынёй расказваў пра вучобу ў Лідскім педвучылішчы і працу настаўніка пачатковых класаў. «Педвучылішча сфарміравала мяне як асобу, — адзначыў Аляксандр Генрыхавіч. — Выкладчыкі дапамаглі выпрацаваць рысы характару, якія спатрэбіліся ў жыцці».

Парламентарый пажадаў педагогам: «Настаўнікі — псіхолагі чалавечай душы, вы кіруеце  дзіцячымі эмоцыямі. Тое, як будзеце прыпадносіць веды, важна для дзяцей. Настаўніцкая дарога шырокая».

Дырэктар сярэдняй школы № 1 г.п. Карэлічы Алена Вярбіцкая зрабіла экскурс у далёкі 2001 год, калі ў навучальнай установе функцыянавалі першыя педагагічныя класы, паведала пра супрацоўніцтва з Мінскім педуніверсітэтам імя Максіма Танка і пра тое, што з першага выпуску пяць вучняў выбралі прафесію настаўніка, а з другога дзевяць выпускнікоў паступілі ў педагагічныя ВНУ. Прафесію настаўніка назвала вялікай і высакароднай. Педагог дае не толькі веды па прадметах, а таксама ўрокі мудрасці, чалавечнасці, міру, дабра.

Аб сваім выбары не шкадуе малады педагог школы Вольга Івашка: «Мае чаканні апраўдаліся, і хочацца выказаць словы ўдзячнасці педкалектыву, а выпускнікам пры выбары жыццёвага шляху параіць усё добра абдумаць і ўзважыць, параіцца з настаўнікамі і бацькамі.»

Настаўнік сярэдняй школы г.п. Мір імя Г. І. Сташэўскай Людміла Пятровіч работу педагога лічыць выдатнай, бо заўсёды знаходзіцца побач з вечнай маладосцю, і калі б давялося выбіраць жыццёвую сцяжынку, зноў пайшла б настаўніцкім шляхам.

Па меркаванні загадчыка метадычнага кабінета ўпраўлення адукацыі райвыканкама Наталіі Ардзюк, настаўнік усё жыццё прадаўжае вучыцца. Наталія Міхайлаўна і сёння адчувае сябе настаўнікам.

Свае асацыяцыі са словам «настаўнік» вучні выказвалі ахвотна: працавітасць, адказнасць, мудрасць, аўтарытэт, цярпенне, дабрыня. Яны называлі педагогаў сябрамі і  мамамі.

Настаўнік інфарматыкі і матэматыкі сярэдняй школы № 1 г.п. Карэлічы Людміла Крывіцкая ў ролі вядучай сустрэчы прадэманстравала веды і прафесіяналізм, што ў чарговы раз пераканала: прафесія настаўніка ганаровая і патрэбная.

Источник: https://grodnonews.by