Педагогі Воранаўшчыны не перастаюць вучыцца: майстар-клас для іх правяла галоўны рэдактар ​​часопіса "Народная асвета"

25 чэрвеня звыш 70 педагагічных работнікаў устаноў дашкольнай і агульнай сярэдняй адукацыі Воранаўскага раёна прынялі ўдзел у майстар-класе "Інфармацыйная культура педагога: падрыхтоўка матэрыялаў для публікацыі ў навукова-метадычным часопісе".

Галоўны рэдактар Святлана Уладзіміраўна Мазурына азнаёміла педагогаў з інфармацыйна-метадычнымі рэсурсамі часопіса "Народная асвета", спецыфікай падбору і рэдагавання артыкулаў, прыёмамі сістэматызацыі дыдактычных матэрыялаў у працэсе абагульнення вопыту работы як асобнага настаўніка, так і ўстановы адукацыі ў цэлым для адлюстравання ў педагагічных СМІ.

Вялікую зацікаўленасць аўдыторыі выклікала практычная работа па прымяненні алгарытму падрыхтоўкі навукова-метадычнага артыкула, фармулёўцы яго тэмы, складанні плана і падбору ілюстрацыйнага матэрыялу.

- Такія майстар-класы арганізоўваюцца для педагогаў ва ўсёй рэспубліцы, - расказала Святлана Уладзіміраўна. – Мы абмяркоўваем, як працаваць з інфармацыйнымі рэсурсамі газет і часопісаў Выдавецкага дома “Педагагічная прэса”, а таксама разбіраем алгарытм падрыхтоўкі публікацый.

Падчас візіта ў раён адбылася сустрэча галоўнага рэдактара часопіса “Народная асвета” з начальнікам аддзела адукацыі Воранаўскага райвыканкама Валянцінай Вінцэнтаўнай Люленка, на якой былі абмеркаваны пытанні арганізацыі падпіскі на выданні медыяхолдынга і далейшай інфармацыйнай падтрымкі дзейнасці ўстаноў адукацыі раёна.