Адкрыццё новага дзіцячага сада, мэтавая падрыхтоўка выпускнікоў, работа профільных класаў прафесійнай накіраванасці, супрацоўніцтва з установамі адукацыі дружалюбных краін і іншыя актуальныя кірункі развіцця сістэмы адукацыі абмеркавалі карэспандэнт "НГ" і начальнік упраўлення адукацыі Лідскага райвыканкама Вольга Тарасюк

Адкрыццё новага дзіцячага сада, мэтавая падрыхтоўка выпускнікоў, работа профільных класаў прафесійнай накіраванасці, супрацоўніцтва з установамі адукацыі дружалюбных краін і іншыя актуальныя кірункі развіцця сістэмы адукацыі абмеркавалі карэспандэнт "НГ" і начальнік упраўлення адукацыі Лідскага райвыканкама Вольга Тарасюк.

У цэнтры ўвагі таксама былі пытанні супрацоўніцтва ўстаноў адукацыі раёна з выданнямі медыяхолдынга "Педагагічная прэса", арганізацыя падпіскі і тэмы будучых публікацый.

У сярэдняй школе № 1 Ліды карэспандэнт азнаёмілася з вопытам работы настаўніцы гісторыі і грамадазнаўства, кіраўніка школьнага гісторыка-краязнаўчага музея "Спадчына" Наталлі Ліханавай. Педагог расказала аб перамогах вучняў на абласных і рэспубліканскіх НПК і алімпіядах, аб асаблівасцях гістарычнага развіцця рэгіёна, багатага знакамітымі людзьмі і цікавымі падзеямі. Сярод значных праектаў музея, якія рэалізуюцца ў сацыяльных сетках, — "Спазнаем гісторыю Лідчыны разам", "Музей Першай у TikTok", "Ліда — горад мужнасці", "Асобы Перамогі".

▫️ За актыўную дзейнасць па прапагандзе міру і ўмацавання дружбы і згоды ў беларускім грамадстве, рэалізацыю міратворчых праграм і дабрачынных акцый Наталлі Ліханавай, а таксама настаўніцы матэматыкі школы і класнаму кіраўніку Святлане Ражковай уручаны ганаровыя граматы абласнога аддзялення Беларускага фонду міру. А вучаніца 11 класа Ксенія Матыс узнагароджана нагрудным знакам "Юны міратворац".

Настаўніца гісторыі настаўнік-метадыст 1-й школы Ліды Вольга Буката падзялілася цікавымі метадамі і прыёмамі работы з высокаматываванымі дзецьмі, расказала аб фарміраванні чытацкай дасведчанасці, выхаванні на ўроках гісторыі грамадзяніна і патрыёта.

Дырэктар школы Сяргей Фанасаў і педагогі-прадметнікі прадставілі напрацоўкі па інавацыйным праекце "Укараненне мадэлі развіцця кампетэнтнасці педагогаў у фарміраванні нацыянальнай ідэнтычнасці навучэнцаў". Педагог-арганізатар школы Наталля Ёрш расказала пра поспехі вучняў у валанцёрскім руху і маладзёжным лідарстве.

Карэспандэнт таксама азнаёмілася з сістэмай ваенна-патрыятычнага выхавання школьнікаў і работай кадэцкіх класаў.

Матэрыялы па выніках паездкі чытайце ў найбліжэйшых нумарах "Настаўніцкай газеты".

Источник: https://t.me/nastgaz