Беларускія педагогі годна прадставілі краіну на ІV Міжнародным фестывалі педагагічнага майстэрства

Беларускія педагогі годна прадставілі краіну на ІV Міжнародным фестывалі педагагічнага майстэрства, які праходзіў у межах 9-­га з’езда настаўнікаў і работнікаў адукацыі дзяржаў — удзельніц СНД. Падрабязнасці — у матэрыяле карэспандэнта “Настаўніцкай газеты”.

Дыпломы пераможцам уручыў намеснік міністра адукацыі Аляксандр Кад­лубай.

Як заўважыў намеснік міністра, заваяваныя дыпломы пацвярджаюць прызнанне прафесіяналізму беларускіх настаўнікаў на міжнародным узроўні. Метадычную падкаванасць нашых педагогаў не раз падкрэс­лівалі ўдзельнікі фестывалю з Казахстана, Расіі і Кыргызстана.

Напрыклад, з майстар-класа Святланы Цыбрук усе выходзілі ўзрушаныя. Святлана Васільеўна гаварыла пра развіццё эмацыянальна-валявой сферы, у прыватнасці пра выкарыстанне сенсорна арыентаваных прыёмаў з кінестэтычным пяском для развіцця самарэгуляцыі ў дзяцей старэйшага дашкольнага ўзросту.

Удзельнікі майстар-класа з задавальненнем пагрузіліся ў засваенне гэтых прыёмаў, прычым літаральна апусціўшы рукі ў пясок, каб атры­маць прамы сенсорны вопыт. Яны, нібы дашкаляты, стваралі пясочныя ўзоры, потым разбуралі іх, каб зрабіць нешта новае. У выніку гульня з пяском дала магчымасць адчуць сваю апору, з якой і нараджаецца падтрымка для дзіцяці.

— Кінестэтычны пясок дазваляе раскрыць унутраныя рэзервы для вырашэння праблем у развіцці эмацыянальна-валявой сферы дзяцей, пераадолець псіхалагічныя цяжкасці, закласці базу для фарміравання навыкаў сацыяльнай адаптацыі і пазітыўнай камунікацыі, раскрыць індывідуальнасць кожнага выхаванца, — заўважыла Святлана Цыбрук.

Яна падкрэсліла, што яе майстар-клас не з’яўляецца тэрапіяй. Гэта прастора для ўсведамлення ўласнага стрыжня.

Наталля Макарэвіч на сваім майстар-класе запрасіла ўсіх прысутных у медыяпадарожжа, якое яны самі і стварылі. Наталля Анатольеўна паставіла перад сабой амбіцыйную мэту — павы­сіць прафесійную кампетэнтнасць калег у пытаннях выкарыстання адукацыйных медыяпадарожжаў для фарміравання ў дзяцей старэйшага дашкольнага ўзросту пазнавальнай цікавасці да гісторыі і культуры роднага горада.

Педагогі ўключыліся ў дзей­насць з энтузіязмам. Дзеці рас­туць ва ўмовах насычанай медыяпрасторы: з ранніх гадоў узаемадзейнічаюць з экранамі, мультымедыйнымі прыладамі, інтэрактыўнымі цацкамі, таму многія задаюцца пытаннем, як гэтае ўзаемадзеянне зрабіць карысным. Наталля Анатольеўна прапанавала фармат вір­туальнай экскурсіі з адпаведным алгарытмам. У выніку ўдзельнікі майстар-класа азнаёміліся з гісторыяй Магілёва і павезлі дамоў іструменты для стварэння ўласных медыяпадарожжаў.

Найбольш шматлюдна было ў аўдыторыі, дзе свае майстар-класы прадстаўлялі педагогі ў намінацыі “Настаўнік”. І зноў сэрцы калег з розных краін пакарылі два нашы педагогі. Настаўніца інфарматыкі з сярэдняй школы № 7 Калінкавіч Вольга Афанасьева знаёміла прысутных з выкарыс­таннем сродкаў візуалізацыі для развіцця інфармацыйнай адукаванасці навучэнцаў. У яе прафесійнай скарбонцы ментальныя карты, радыяльная схема (дапамагае ўбачыць, як розныя паняцці звязаны паміж сабой і якім чынам суадносяцца), правілы сеткавага этыкету і інш.

Яе калега, настаўніца хіміі з 210-й сталічнай школы Юлія Кашырава, расказвала пра магчымасці прымянення ў адукацыйным працэсе інструментарыю для структуравання вучэбнага матэрыялу. Удзельнікі майстар-класа вучыліся арганізоўваць паэтапнае навучанне школьнікаў самастойнай рабоце з інфармацыяй, скла­даць шаблоны для структуравання вучэбнага матэрыялу па распрацаваным алгарытме з выкарыстаннем розных тыпаў інфармацыйных блокаў.

Дыплом І ступені ў гэтай намінацыі атрымаў настаўнік матэматыкі з Казахстана Бауыржан Базарбаеў, які прэзентаваў практычны дапаможнік (трэнажор) для фарміравання карысных фінансавых звычак, навыкаў планавання і адказнага стаўлення да грошай.

У намінацыі “Псіхолаг/сацыяльны педагог” дыплом І ступені атрымала педагог-псіхолаг дашкольнага цэнтра развіцця дзіцяці № 1 Ліды Святлана Цыб­рук, а дыплом ІІІ ступені — педагог-псіхолаг сярэдняй школы № 14 Мазыра Юлія Зялімава.

У намінацыі “Выхавальнік” дыпломам І ступені ўзнагароджана Ірына Апанасік, выхавальніца дзіцячага сада № 1 Дзяржынска, дыпломам ІІ ступені — Наталля Макарэвіч, выхавальніца дашкольнага цэнтра развіцця дзіцяці № 1 Магілёва.

Намінацыя “Настаўнік” таксама стала пераможнай для нашых педагогаў. Дыпломы ІІ ступені атрымалі Вольга Афанасьева, настаўніца інфарматыкі сярэдняй школы № 7 Калінкавіч, і Юлія Кашырава, настаўніца хіміі сярэдняй школы № 210 Мінска.

Источник: https://nastgaz.by