У Бераставіцкім раёне метадычная работа будуецца на выкарыстанні новых форм педагагічнага ўзаемадзеяння

Тэхналогіі супрацоўніцтва і ўзаемнага навучання педагогаў як фактары павышэння прафесійнага майстэрства былі ў цэнтры ўвагі аднаго з нядаўніх пасяджэнняў вучэбна-метадычных аб’яднанняў.

Для падрыхтоўкі ўрока англійскай мовы ў 9 класе па тэме “Фаст-фуд: за або супраць” на пасяджэнні вучэбна-метадычнага аб’яднання настаўнікаў замежнай мовы выкарыстана форма прафесійнага супрацоўніцтва “Сумеснае праектаванне вучэбных заняткаў”. Творчая група настаўнікаў замежнай мовы раёна пад кіраўніцтвам педагога сярэдняй школы аг.Пагранічны М.Л.Круповіч спраектавала ўрок англійскай мовы з прымяненнем сучасных метадаў і прыёмаў навучання з іх уласнага вопыту работы.

Урок правяла малады спецыяліст А.П.Амяльянчык з Вялікаэйсмантаўскай сярэдняй школы. Яе калегі выконвалі функцыю назіральнікаў. Аналізуючы заняткі, настаўнікі вызначалі эфектыўнасць і перавагі прапанаваных тэхналогій, метадаў, прыёмаў і спосабаў арганізацыі вучэбнай дзейнасці навучэнцаў. Педагогі акцэнтавалі ўвагу на матэрыяле, карысным для кожнага вучня, абмеркавалі, што і якім чынам у далейшым можна змяніць у плане ўрока.

Арганізаваўшы работу ў групах, А.Р.Лапцюхова, настаўніца Старадварэцкай базавай школы, прадэманстравала методыку арганізацыі вучэбнай дзейнасці навучэнцаў у камунікатыўнай калектыўна-размеркаванай форме.

Нестандартны падыход да арганізацыі пасяджэнняў вучэбна-метадычных аб’яднанняў, выкарыстанне інтэрактыўных форм педагагічных зносін выклікае цікавасць у настаўнікаў, садзейнічае іх актыўнасці і, галоўнае, эфектыўнаму супрацоўніцтву і ўзаемнаму навучанню, набыццю новага педагагічнага вопыту ў кааперацыі з калегамі.

Гэта цалкам заканамерна, бо сучасная адукацыя арыентавана на актыўнага, мабільнага, ініцыятыўнага педагога, адкрытага да ўсяго новага, які дакладна ўсведамляе неабходнасць пастаяннага прафесійнага росту, гатовага працаваць у камандзе і вырашаць універсальныя задачы ў розных сферах.

Источник:https://nastgaz.by