Сярэдняя школа №42 Гродна пачынае пісаць сваю гісторыю з уласнымі традыцыямі, дасягненнямі і поспехамі

У Гродне адкрылася новая школа ў маладым мікрараёне Грандзічы, паведамляе карэспандэнт “Настаўніцкай газеты”.

— Новая школа ў Гродне расчыніла свае дзверы для больш як дзвюх тысяч навучэнцаў. Для кагосьці гэта цэлы новы свет, калі гаварыць пра першакласнікаў і іх бацькоў. Па ўсёй краіне больш за мільён навучэнцаў сярэдніх школ селі за школьныя парты. А 110 тысяч сярод іх прыйшлі ў школу першы раз гэтак жа, як і вы, дарагія першакласнікі, — звярнуўся да вучняў 1 верасня Прэм’ер-міністр Рэспублікі Беларусь Раман Галоўчанка.

Ён таксама адзначыў, што адукацыя — адзін з галоўных прыярытэтаў палітыкі нашай дзяржавы. Штогод будуюцца новыя сады і школы. У Дзень ведаў у краіне адчынілі свае дзверы дзве школы, адна з іх — у Гродне. Разам з тым да новага навучальнага года прыведзены ў парадак больш за 2800 школ па ўсёй Беларусі.

— Важна, каб дзеці раслі моцнымі і здаровымі, былі патрыётамі нашай краіны. Прыемна бачыць, як самыя маленькія дзеткі падчас выканання гімна падпявалі, ведалі словы. А школа — гэта не толькі месца, дзе атрымліваюць веды, але і выхоўваюцца грамадзяне і патрыёты, — адзначыў Раман Галоўчанка.

— Наша будучыня — гэта, перш за ўсё, нашы дзеці, — сказала дырэктар школы Аліна Жук. — Сярэдняя школа № 42 пачынае пісаць сваю гісторыю з уласнымі традыцыямі, дасягненнямі і поспехамі. Упэўнена, што яна стане другім домам для кожнага з вас, таму што тут створаны самыя лепшыя ўмовы.

Ганаровымі гасцямі свята таксама сталі першы намеснік старшыні Гродзенскага аблвыканкама Юрый Валяваты, памочнік Прэзідэнта Рэспублікі Беларусь — інспектар па Гродзенскай вобласці Юрый Караеў, намеснік міністра адукацыі Сяргей Руды, старшыня Гродзенскага гарвыканкама Андрэй Хмель.

У час азнаямленчай экскурсіі па ўстанове адукацыі не раз адзначалася, што школа пабудавана па самых сучасных стандартах. Яна ўяўляе сабой адукацыйны, сацыякультурны і фізкультурна-спартыўны цэнтр у мікрараёне Грандзічы. Будаўніцтва школы пачалося ў 2020 годзе, і да сённяшняга дня агульная сума праведзеных тут работ склала больш за 34 мільёны рублёў.

Па праекце разлічана новая ўстанова адукацыі на 1020 месцаў. Такая колькасць навучэнцаў зможа наведваць новую школу толькі ў адну змену. Усяго ж за парты новабудоўлі для школьнікаў у новым мікрараёне сядуць больш за дзве тысячы вучняў.

Для іх камфорту ва ўстанове адукацыі створана ўсё неабходнае: ёсць 60 вучэбных кабінетаў, два камп’ютарныя класы, шэсць лінгафонных кабінетаў, майстэрні, актавая зала на 290 месцаў, інфармацыйна-бібліятэчны цэнтр з чытальнай залай, спартыўная зала і дзве трэнажорныя залы, залы барацьбы, цяжкай атлетыкі і фітнесу, басейн, кабінет сацыяльна-педагагічнай і псіхалагічнай службы, стаматалагічны кабінет.

На тэрыторыі школы размешчаны спартыўныя пляцоўкі, якія стануць галоўным месцам спартыўнага прыцягнення для ўсіх жыхароў мікрараёна. Гэта сучаснае футбольнае поле, тэнісны корт, валейбольныя і баскетбольныя пляцоўкі, хакейная каробка і бегавыя дарожкі. Для арганізацыі харчавання абсталявана сталовая на 340 пасадачных месцаў.

Пасля таго як прагучаў першы званок, галоўныя героі свята — першакласнікі — першымі ўвайшлі ў новую школу. Першы ўрок у іх, як і ва ўсіх беларускіх навучэнцаў, прайшоў пад дэвізам “Беларусь і Я — дыялог міру і стварэння”. Усе першакласнікі атрымалі падарунак ад Прэзідэнта краіны — кнігу “Беларусь — наша Радзіма”.

Разам з дзецьмі на ўрачыстай лінейцы хваляваліся і бацькі, якія прыйшлі падтрымаць дзяцей. Многія адзначалі, што за новабудоўляй сачылі дзень за днём: аб’ект быў вельмі запатрабаваны і доўгачаканы. Цяпер у жыхароў мікрараёна Грандзічы з’явілася сучасная школа ў крокавай даступнасці.

— За тым, як расла школа, сачылі літаральна з вокнаў. Вельмі чакалі яе адкрыцця ўсёй сям’ёй, асабліва дачка Варвара, якая сёння з гонарам прыняла ўдзел у цырымоніі ўзняцця Дзяржаўнага сцяга. Пасля пераезду працягвалі вучыцца ў адной са школ цэнтральнай часткі горада. Кожны дзень у мінулым годзе толькі на дарогу да навучальнай установы дачка затрачвала амаль дзве гадзіны. Зараз шлях да школы будзе займаць усяго некалькі мінут, — падзялілася маці вучаніцы 6 класа Дар’я Мацюкевіч.

Источник: https://nastgaz.by