У ліпеньскім выпуску метадычнага дадатку да «Настаўніцкай газеты» «Партфоліа» настаўнікі краіны ўзнімаюць самыя актуальныя пытанні.

Члены рэспубліканскага клуба «Крыштальны журавель» штогод сустракаюцца ў метадычным летніку на возеры Белае, непадалёк ад пасёлка Азёры Гродзенскай вобласці. Не толькі для таго, каб адпачыць, але і інтэнсіўна папрацаваць, абмяняцца вопытам. У меню «жураўлінай» метадычнай кухні на гэты раз уваходзіць тры стравы: функцыянальная адукаванасць, штучны інтэлект і вечаровыя мерапрыемствы. Падрабязней пра гэта піша Святлана Іванюшына, настаўніца пачатковых класаў сярэдняй школы № 1 Лагойска.

Настаўніца пачатковых класаў сярэдняй школы № 8 Пінска Ларыса Сімашэнка ў сваім артыкуле выказвае занепакоенасць тым, што ў дзяцей з кожным годам зніжаецца цікавасць да чытання, яны чытаюць больш павольна, з памылкамі, не могуць пераказаць змест тэксту. Каб павысіць чытацкую адукаванасць малодшых школьнікаў, педагог прымяняе актыўныя метады і прыёмы работы з тэкстам.

Чытацкую адукаванасць на ўроках хіміі развівае і настаўнік-метадыст гімназіі Хойнікаў Вікторыя Мастабай пры дапамозе прыёму «Шэсць капелюшоў мыслення». На старонках газеты яна падрабязна расказвае, як можна паглыбіць разуменне вучнямі матэрыялу і развіць іх крытычнае мысленне.

Пра інфармацыйную, тэарэтычную, практычную і карэкцыйную работу з вучнямі 10—11-х класаў па падрыхтоўцы да цэнтралізаванага экзамену па беларускай мове і найбольш эфектыўныя прыёмы павышэння арфаграфічных навыкаў расказвае ў сваім артыкуле Ілона Макрыцкая, настаўніца беларускай мовы і літаратуры сярэдняй школы № 17 Ліды.

Пасля вывучэння тэмы «Грошы» ў 8-м класе настаўніца англійскай мовы Мінскай міжнароднай гімназіі Наталля Пратасевіч прапанавала навучэнцам выканаць вучэбны праект Money for travel to Grodno з мэтай навучыць іх правільна абыходзіцца з грашыма, каб паездка ў Гродна на выхадныя прайшла ўдала.

Ці можна перафармаціраваць сучасных вучняў? Пра гэта задумалася Жанна Петухова, настаўніца рускай мовы і літаратуры сярэдняй школы № 2 Круглага. Разважаючы на гэтую тэму, педагог прыйшла да высновы, што ў дзяцей трэба развіваць эмацыянальны інтэлект, крытычнае мысленне, трэніраваць увагу, заахвочваць іх да жывых зносін, распрацоўваць сцэнарыі не проста ўрокаў, а ўрокаў жыцця. У педагагічнай скарбонцы аўтара артыкула нямала цікавых знаходак, якія дапамагаюць дастукацца да скрынэйджараў (сучасных падлеткаў).

Для поспеху ў алімпіядзе па прадмеце важны не толькі талент, але і тытанічная праца і хаця б крыху шанцавання. Настаўніца біялогіі гімназіі імя І.М. Ерашова Лепеля, кіраўнік раённага ВМА настаўнікаў біялогіі Кацярына Шарко падчас інтэрв’ю падзялілася сакрэтамі эфектыўнай падрыхтоўкі алімпіяднікаў, закранула псіхалагічныя аспекты гэтага пытання, расказала і аб вопыце правядзення міжшкольных факультатыўных заняткаў па вучэбнай праграме «Уводзіны ў аграрныя прафесіі».

Источник: https://nastgaz.by