У скарбонцы каледжа – новыя ўзнагароды

На базе Ашмянскага аграрна-эканамічнага каледжа прайшоў абласны этап конкурса “ProfSkills-2025” па кампетэнцыі “Цагляная кладка”, у якім прынялі ўдзел навучэнцы Ваўкавыскага, Лідскага і Ашмянскага каледжаў. Удзельнікам спаборніцтва неабходна было выканаць цагляную кладку, якая ўяўляла сабой канструкцыю з цэглы згодна з адпаведным планам. На выкананне задання адводзілася восем гадзін. Канкурсанты перад пачаткам спаборніцтваў адчувальна хваляваліся, аднак у працэсе працы эмоцыі адышлі на другі план. Ашмянскі каледж прадстаўляў Валянцін Клінцэвіч.

З вялікім імпэтам хлопец узяўся за выкананне задання. Аўтарытэтнае журы ацэньвала не толькі хуткасць працы, але і яе якасць. У выніку месцы размеркаваліся наступным чынам: бронза на спаборніцтвах дасталася Лідскаму каледжу, серабро – Ваўкавыскаму, а абсалютным пераможцам спаборніцтваў стаў Ашмянскі каледж. Валянцін выканаў працу найбольш якасна. Ён быў узнагароджаны дыпломам першай ступені. Далей навучэнец прадставіць каледж на рэспубліканскім этапе спаборніцтваў у адпаведнай кампетэнцыі.

На базе Жыровіцкага дзяржаўнага аграрна-тэхнічнага каледжа прайшоў абласны этап конкурса “ProfSkills-2025” па кампетэнцыі “Эксплуатацыя сельскагаспадарчых машын”. Прымалі ўдзел у спаборніцтве і прадстаўнікі Ашмянскага каледжа, якія змагаліся за права прадставіць Гродзенскую вобласць на рэспубліканскім этапе конкурса. Яны дэманстравалі свае веды і ўменні ў чатырох модулях. Ашмянец Сяргей Шаблавінскі справіўся з заданнямі кожнага модуля і атрымаў бронзу.

Высокі ўзровень падрыхтоўкі таксама прадэманстравалі і будучыя бухгалтары і праграмісты. На базе Гродзенскага дзяржаўнага ўніверсітэта імя Янкі Купалы прайшла дзявятая рэспубліканская алімпіяда па эканамічных і IT-дысцыплінах. Спаборніцтва складалася з двух этапаў – вочнага і завочнага. Удзельнікі выконвалі тэсты і адпаведныя кейсы, а таксама падрыхтавалі праект “Мой прафесійны выбар”.

Ніхто з ашмянскіх канкурсантаў не вярнуўся дамоў без дыпломаў. Мікіта Шаламіцкі атрымаў першае месца па спецыяльнасці “Інфармацыйныя сістэмы і тэхналогіі”. Тры дыпломы атрымалі навучэнцы каледжа па спецыяльнасці “Фінансы і крэдыт”: Анастасія Буткевіч і Юлія Лянцэвіч занялі другое месца, а Дар’я Адашкевіч – трэцяе. Да алімпіяды навучэнцаў рыхтавалі вопытныя педагогі, якія не толькі давалі новыя веды, але і падтрымлівалі канкурсантаў.

Источник: https://www.osh.by