8 февраля 11-классники Кореличчины будут сдавать репетиционный ЦЭ. Подробности — у Ирины Осташевич

8 лютага для будучых выпускнікоў  адбудзецца  рэпетыцыя цэнтралізаванага экзамену. Яго мэта – максімальна адпрацаваць арганізацыйныя моманты: ад выбару навучэнцамі прадмета для рэпетыцыйнага ЦЭ, рэгістрацыі ў сістэме Рэспубліканскага інстытута кантролю ведаў да падвозу ў пункты правядзення экзамену, рассаджвання ў аўдыторыях, запаўнення бланкаў адказаў.

Для рабят РЦЭ – гэта і эмацыянальная падрыхтоўка, магчымасць праверыць свае веды ва ўмовах, максімальна набліжаных да іспыту. Навучэнцам трэба засяродзіцца на тым, каб паказаць вынікі навучання ў школе, а задача бацькоў — падтрымаць сваіх дзяцей.

Аб арганізацыі і правядзенні РЦЭ для навучэнцаў 11 класаў расказала начальнік аддзела адукацыі Карэліцкага райвыканкама Ірына Асташэвіч.

— Сёлета ў раёне 96 выпускнікоў прымуць удзел у рэпетыцыі ЦЭ. Усе яны ўжо вызначыліся з прадметамі, па якіх  будуць здаваць цэнтралізаваны экзамен. Да 13 снежня ўсе навучэнцы прайшлі   рэгістрацыю. Паводле яе дадзеных, выпускнікі школ раёна будуць здаваць РЦЭ   па дзевяці прадметах (руская мова – 12 чалавек, беларуская мова – 18, матэматыка – 31, англійская мова – 6, грамадазнаўства  – 5,  хімія –  5,  біялогія –  14,  фізіка –  4,  гісторыя Беларусі – 1).

Рэпетыцыя цэнтралізаванага экзамену пройдзе ў адпаведнасці з інструкцыяй аб правядзенні самога ЦЭ. Вызначаны пункт правядзення РЦЭ – гэта сярэдняя школа № 1 г.п. Карэлічы.  Створаны камісіі па падрыхтоўцы і правядзенні РЦЭ. Вызначаны  35 адказных педагогаў, якія будуць працаваць у  сямі аўдыторыях, распрацаваны графікі падвозу навучэнцаў да пункта правядзення іспытаў. Калі навучэнец справіцца з заданнямі хутчэй, то  на пункце правядзення экзаменаў прадугледжана асобнае памяшканне з асобным уваходам.

Экзаменацыйныя матэрыялы для правядзення рэпетыцыі цэнтралізаванага экзамену, як і ў будучым для самога экзамену, сфарміраваны Рэспубліканскім інстытутам кантролю ведаў. Выпрабаванні 8 лютага пачнуцца адначасова па ўсёй краіне – у 11.00.

Источник: https://www.polymia.by